Plantun de Prouvènço

Pèr coumpara dos planto d'encò nostre

Galium obliquum & Scrophularia nodosa

Galium obliquum

Rubiaceae

Noms en français : Gaillet oblique, Gaillet jaunâtre.

Descripcioun :
La reboulo-de-galis trachis dins li tepiero seco, li bos clar e d'un biais generau, dins lis endré secarous fin qu'en auto mountagno. Es uno planto de la cambo primo, carrado, emé d'entre-nous proun long. Li fueio soun peréu fino emé un pichot bènc e uno souleto costo. Li flour en quàsi pinceloun, an de petalo un pau jaunet emé uno pichoto pouncho. Èi verai sèmblo un pau de-galis, pamens coumpara emé lis àutri reboulo qu'èi pas toujour eisa de li destria.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 50 cm
Fueio : verticilado
Tipe bioulougico : Emicriptoufite
Cicle bioulougico : Planto renadivo

Gènre : Galium
Famiho : Rubiaceae

Coulour de la flour : Blanco
Petalo : 5
Ø (o loungour) flour : 2,7 à 3,2 mm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Mai à avoust

Liò : Tepiero seco - Relarg à jóuinis aubret - Bos clar
Estànci : Termoumediterran à Aupen
Couroulougi : Éuropenco-Sud-Ouèst
Ref. sc. : Galium obliquum Vill., 1785

Erbo-dis-escrolo

Scrophularia nodosa

Scrophulariaceae

Nom en français : Scrofulaire noueuse.

Descripcioun :
L'erbo-dis-escrolo douno d'èr à l'erbo-dóu-siège, pamens èi mens forto, sa tijo èi carrado mai sènso alo e pleno (fotò). Ei gaire coumuno au nostre, aleva dins lis Aup marino. Trachis dins li relarg fres.

Usanço :
Coume soun noum lou dis, l'erbo-dis-escrolo èro emplegado pèr gari (o pulèu sougna) lis escrolo que soun de boufigo (fotò) que vènon dins lou còu en rapport emé la tuberculòsi que ié disien à l'Age-Mejan, en latin, struma o morbus regius (mau de rèi). A l'Age-Mejan li rèi an lou poudé de gari lis escrofo ("écrouelles" en francés). A forto doso la planto pourrié èstre empouisounanto.